بین الاقوامی مرکز اورچائنیز یونیورسٹی اسپتال کے درمیان معاہدہ

0
1046

بین الاقوامی مرکز اورچائنیز یونیورسٹی اسپتال کے درمیان معاہدہ
دونوں ممالک روائیتی ادویات میں مزید تعاون بڑھائیں گے، ترجمان بین الاقوامی مرکز جامعہ کراچی
ڈائریکٹر بین الاقوامی مرکز پروفیسر اقبال چوہدری اور چین کے پروفیسرلیو چنگ قیان نے معاہدے پردستخط کیے
کراچی:۔ بین الاقوامی مرکز برائے کیمیائی و حیاتیاتی علوم (آئی سی سی بی ایس) جامعہ کراچی اورچین کے بیجنگ ٹریڈیشنل چائینز میڈیسن اسپتال (بی ٹی سی ایم ایچ)، کیپٹل میڈیکل یونیورسٹی کے درمیان حال ہی میں ایک مفاہمت کی یاد داشت پر دستخط ہوئے ہیں، جس کا مقصد دونوں ممالک کے درمیان روائیتی ادویات کے شعبے کو نہ صرف فروغ دینا ہے بلکہ متعلقہ شُعبے میں تحقیقی و تعلیمی تعاون کو مذید فروغ دینا بھی ہے۔
آئی سی سی بی ایس جامعہ کراچی کے ترجمان کے مطابق آئی سی سی بی ایس جامعہ کراچی کے سربراہ اور کامسٹیک کے کوارڈینیٹر جنرل پروفیسر ڈاکٹر محمد اقبال چوہدری اور چینی ہم منصب پروفیسر ڈاکٹرلیو چنگ قیان نے روائیتی چینی ادویات اور روائیتی یونانی ادویات کے موضوع پر آئی سی سی بی ایس جامعہ کراچی میں منعقدہ ایک روزہ سائنو پاکستان سمپوزیم کی افتتاحی تقریب کے اختتام پر کیا،اس موقع پر وزیر اعظم کی نیشنل ٹاسک فورس برائے سائینس اور ٹیکنالوجی کے سربراہ اور بین الاقوامی مرکز کے سرپرستِ اعلیٰ پروفیسر عطا الرحمن اور شیخ الجامعہ کراچی پروفیسر خالد محمودعراقی بھی موجود تھے۔
واضح رہے کہ بین الاقوامی مرکز اپنی نوعیت کا واحد پاکستانی تحقیقی ادارہ ہے جونہ صرف آئی ایس او سے سند یافتہ ہے بلکہ “یونیسکوسینٹر فار ایکسلینس کیٹیگری 2 انسٹی ٹیوٹ” کے منصب پر بھی فائز ہے، اس کے برعکس بی ٹی سی ایم ایچ بیجنگ سب سے بہترین اور روائیتی چینی ادویات کا جدید چینی اسپتال ہے جس کے وظائف میں روائیتی چینی ادویات سے علاج، تعلیم، سائینسی تحقیق اور بیماریوں سے بچاو وغیرہ شامل ہیں۔ ترجمان کے مطابق معاہدے کے تحت دونوں ممالک کے ادارے روائیتی ادویات میں باہمی تعاون بڑھائیں گے،مشترکہ ورکشاپ اور سیمینار کا انعقاد، ڈاکٹروں کی تربیت، ایم فل اور پی ایچ ڈی اسکالرز کی تحقیقی معاونت، اورسائینسی اجلاس کا انعقاد بھی کریں گے۔

LEAVE A REPLY

Please enter your comment!
Please enter your name here