کراچی بارالیکشن، نعیم قریشی صدر، عامر نواز وڑائچ جنرل سیکرٹری، محمدرضوان خان خزانچی اورنائب صدر کی نشت پر شازیہ منظور مغل منتخب
کراچی:(اسٹاف رپورٹر) کراچی بار ایسوسی ایشن کے سالانہ انتخابات میں نعیم قریشی صدر اور عامر نواز وڑائچ جنرل سیکرٹری منتخب ہوگئے ہیں ۔ تفصیلات کے مطابق کراچی بار ایسوسی ایشن کے انتخابات سٹی کورٹ میں منعقد ہوئے ، انتخابات کے موقع پردہشت گردی کے خدشے کی وجہ سے سیکورٹی کے سخت انتظامات کئے گئے تھے ،تمام داخلی راستوں پر اضافی نفری بھی تعینات کی گئی تھی ۔انتخابات میں کراچی بار کے صدر کے لئے نعیم قریشی، منیر احمد ملک اور جلیل خان مروت میں مقابلہ ہوا، جنرل سیکریٹری کی نشست کے لئے چھ امیدوار میدان میں تھے۔ نائب صدر کے لئے 7، جوائنٹ سیکریٹری کے لئے 3 امیدوار آمنے سامنے ہوئے ۔ خزانچی اور لائبریرین کی نشست کے لئے 5,5 امیدوار مدمقابل تھے ، ممبر منیجنگ کمیٹی کے لئے ریکارڈ 65 امیدواران کے درمیان مقابلہ ہوا۔ کراچی بار ایسوسی ایشن کے انتخابات میں 7424 رجسٹرڈ ووٹرزنے حق رائے دہی استعمال کیا، چار اضلاع جنوبی ، شرقی ، وسطی اور غربی کی 24 عدالتوں میں پولنگ بوتھ بنائےگئے تھے ، پولنگ کا عمل صبح 9 بجے شروع ہوا جو شام 5 بجے تک جاری رہا ۔ انتخابات میں صدر کی نشست کے لئے نعیم قریشی منتخب ہوئے جبکہ جنرل سیکرٹری کے لئے عامر نواز وڑائچ کامیاب قرار پائے ۔ اس کے علاوہ نائب صدر کی نشت پر شازیہ منظور مغل منتخب ہوئیں ، جوائنٹ سیکرٹری کی نشست پر شعیب ناریجو کامیاب ہوئے ، خزانچی کی نشست پر محمدرضوان خان منتخب ہوئے جبکہ لائبریرین کے لئے فدا حسین بریرو کامیاب قرار پائے ۔