بین الصوبائی تھروبال چیمپیئن شپ شروع ہوگئی۔
کوئٹہ:(اسٹاف رپورٹر) پاکستان تھروبال فیڈریشن کے زیراہتمام اور بلوچستان سپورٹس بورڈ کے تعاون سے بین الصوبائی تھروبال چیمپیئن شپ ایوب سپورٹس کمپلیکس کوئٹہ میں شروع ہوگئی ہے۔ چیمپئن شپ کا افتتاح سیکرٹری کھیل عمران گچکی نے کیا۔ اس موقع پربلوچستان سپورٹس بورڈ کے ڈائریکٹر جنرل درا بلوچ، پاکستان سپورٹس بورڈ کے ڈائریکٹر عمران یوسف پاکستان تھروبال فیڈریشن کے نائب صدر جعفر علی شاہ، سیکرٹری جنرل مقبول آرائیں، بلوچستان تھروبال ایسوسی ایشن کی صدر میڈم اختر خان کے علاوہ شائقین کی کثیر تعداد بھی موجود تھی۔ چیمپئن شپ کے افتتاحی روز کھیلےگئے مردوں کے مقابلوں میں خیبر پختونخوا نے گلگت بلتستان کو 0-2 سے، سندھ نے بلوچستان کو 1-2 سے اور سندھ نے اسلام آباد کو 0-2 سے شکست دی۔ جبکہ خواتین کے مقابلوں میں سندھ نے بلوچستان کو 0-2 سے،
پنجاب نے بلوچستان کو 0-2 سے، گلگت بلتستان نے خیبرپختونخوا کو 1-2 سے اور سندھ نے پنجاب کو 0-2 سے شکست دی۔ چیمپئن شپ میں مردوں اور خواتین کے الگ الگ مقابلے کھیلے جا رہے ہیں۔ان مقابلوں میں چھ مرد اور چھ خواتین کی ٹیمیں حصہ لے رہی ہیں جن میں میزبان بلوچستان، پنجاب، سندھ، خیبرپختونخوا، اسلام آباد اور گلگت بلتستان کی ٹیمیں شامل ہیں۔
یہ چیمپیئن شپ 7 نومبر تک جاری رہے گی اور چیمپئن شپ کے اختتام پر کامیابی حاصل کرنے والے کھلاڑیوں میں انعامات تقسیم کئے جائیں گے۔