لاہور،13مئی 2020:سابق ٹیسٹ اسپنر ندیم خان کو تعیناتی کے ایک مربوط عمل سے گزرنے کے بعد پی سی بی کا ڈائریکٹر ہائی پرفارمنس مقرر کردیا گیا ہے۔
ندیم خان ان 16 امیدواروں میں شامل تھے جنہوں نے اس عہدےکے لیے درخواست دی تھی۔ اقبال قاسم(چیئرمین کرکٹ کمیٹی)، وسیم اکرم (رکن کرکٹ کمیٹی)، ڈیوڈ پارسنز (سابق ڈائریکٹر پرفارمنس انگلینڈ اینڈ ویلز کرکٹ بورڈ) اور وسیم خان (چیف ایگزیکٹو پی سی بی) نے ان کا انٹرویو کیا۔
ندیم خان نےاپنی تقرری کے فوری بعد قومی سلیکشن کمیٹی کے کوآرڈینیٹر کے عہدے سےاستعفیٰ دے دیا ہے۔اس عہدے کے لیے ندیم خان کے متبادل کا فیصلہ جلد کردیا جائے گا۔
ڈائریکٹراکیڈمیز مدثر نذر اور ڈائریکٹر ڈومیسٹک کرکٹ آپریشنز ہارون رشیدکی روانگی کے بعد نو تعمیراتی عمل کے تحت ڈائریکٹرہائی پرفارمنس کا نیا عہدہ تخلیق کیا گیا۔دونوں عہدیداروں کی مدت ملازمت 31 مئی کومکمل ہورہی ہے۔اب دونوں شعبوں کی ذمہ داریاں ڈائریکٹر ہائی پرفارمنس نبھائیں گے۔پی سی بی کو یقین ہے کہ نیا نظام کھیل اور کھلاڑی کے لیے مفید ثابت ہوگا۔
اس تقرری کے تناظر میں ندیم خان ،معین خان کرکٹ اکیڈمی کے قیام اور یو بی ایل اسپورٹس اکیڈمی کی کامیاب بحالی اور مالی معاملات کا تجربہ رکھتےہیں۔
فی الحال یو بی ایل اسپورٹس کمپلیکس میں 1200 طالب علم ہیں۔ندیم خان کے دور میں یو بی ایل کرکٹ ٹیم قائداعظم ٹرافی 16-2015 کے فائنل میں ر سائی حاصل کرنے کے ساتھ ساتھ انٹرڈیپارٹمنٹل ون ڈے کپ 18-2017جیتنے میں کامیاب رہی تھی۔ ندیم خان کے زمانے میں ہی یو بی ایل کے 4 کھلاڑیوں نے قومی کرکٹ ٹیم میں جگہ بنائی جبکہ جونیئر سطح پر 5 کھلاڑیوں نے مختلف ٹیموں میں پاکستان کی نمائندگی کی۔
ایک کامیاب ایڈمنسٹریٹر بننے سے قبل50 سالہ ندیم خان نے 87-1986 تا 03-2002 تک فرسٹ کلاس کرکٹ کھیلی۔ اس دوران انہوں نے 2 ٹیسٹ، 2 ایک روزہ اور 153 فرسٹ کلاس میچز کھیلے۔ندیم خان کے بین الاقوامی کیرئیر کی جھلکیوں میں 1993 میں برائن لارا کی وکٹ حاصل کرنا اور معروف کلکتہ ٹیسٹ 1999میں سچن ٹنڈولکر کو رن آؤٹ کرنا شامل ہے۔
